مسرحية عيد ميلاد

مسرحية عيد ميلاد

تأليف / كريم عمرو

الشخصيات

الدكتور ناصر : شخص نحيف يرتدي نظاره دائما ما يحركها ويعدلها اثناء حديثه .

زوجة الدكتور ناصر : سيده جميله علي وشك الولاده .

نرجس : ابنة الدكتور ناصر الكبيره وهي شديدة الجمال والانوثه والرقه .

ياسمين : طفله لا تتخطي السبع سنوات .

محمد : خطيب نرجس شاب وسيم .

ا.فيصل : والد محمد , مدرس لغه عربيه معتز بلغته كثيرا مايخلط الفحصي في كلامه .

زوجة فيصل : والدة محمد , دكتوره في علوم السياسه في الجامعه ترتدي زيا رسميا للغايه ملامحها حاده .

يوسف : اخو محمد طفل صغير في نفس عمر ياسمين.

المشهد الاول

" مجموعة من الشباب يتحدثون عن بعض المواقف والقصص التي وصلت اليهم من سوريا "

ش1: الموضوع مقلق جدا و محزن ,, انا عمري ما كنت اتخيل ان الوضع بالسوء دا .

ش2 : ومين يعني كان يتخيل .. مين كان يتخيل ان فجأه الدنيا تتقلب و محدش قادر يحل وكل ما حد يتدخل المشكله بتزيد .

ش3 : القصص والاخبار اللي كل يوم بقرئها و كل يوم بتجيلي مخلياني في حاله نفسيه سيئه جدا ,, مفيش خبر واحد يوحد ربنا يديك امل في ان الجاي افضل , دم وقتل و تشريد و تهجير قهري و لجوء واهانه . الموضوع مقزز جدا .

ش1 :  انا اخر قصه وصلتني دي كانت ملهمه جدا ,, حقيقي انا مش عارف ابدئها ازاي ولا حتي عارف هننشرها ازاي او نصيغها ازاي لانها اكبر من اننا نصيغها دي قصة نضال من اجل الفرح لا اكثر ولا اقل .

ش2 : قول ياعم وخلصنا الموضوع مش ناقص .

ش3 : احكي  ونحاول نخرجها للناس بشكل يتقبلوه.

ش1 : دكتور ناصر اب لاسره مكونه من اربعه او نقول خمسه باعتبار انه مراته حامل ,, زوجته مدرسة رياضيات وبتحضر ..........

" الصوت بيختفي تدريجي مع زيادة الاضائه تدريجيا علي  حجرة المعيشه في منزل الدكتور ناصر "

" حجرة  بها مكتب وعليه بعض الكتب و برواز صور , يرتبه الدكتور ناصر وينظفه , وفي احد الزوايا الاخري من الحجره  يوجد بعض الاثاث  - طاوله صغيره وحولها  اربع كراسي جلديه  , الدكتور يرتدي بدله سوداء  "

          

الدكتور : " يتحدث وهو يرتب مكتبه " طبعا طبعا مؤتمر بنيويورك لدعم سوريا و ايجاد  حل للازمه ,, كتاب محاكم التفتيش ايه اللي جابك ف ايدي دلوقتي دا حتي فال وحش , لكن غريبه يعني حتي المساعدات الانسانيه بتقصف يعني ايه ذنبه دا رايح يساعد , مش قالو ان هم جايين يساعدوا البلاد المحاصره طب بيقصفوا ليه المساعدات , موضوع غريب , الشيطان يعظ لنجيب محفوظ ياه كان نفسي اكملها احطها هنا ف الاول عشان اول ما اشوف افتكر ,, 100 دوله بقي هيجتمعوا لكن مين فعلا مهتم , الدول بتتجمع بيعزوا بعض ويقولو كفايا دم و انقذوا الاطفال  واحنا نروح نعزي بعض كل يوم في واحد قريب مننا يموت وبعد اجتماعتهم نعزي بعض اكتر  حاجه غريبه , الموضوع تحس ان في حاجة بتحركه بشكل منظم جدا ,, اعلي من قدرتنا علي الفهم والاستيعاب , احجار علي رقعة الشطرنج ايه اللي جاب الكتاب دا عندي مش فاكر اني اشتريت حاجه ز ي دي ,, عموما خير زيادة في الثقافه والمعرفه .

زوجته : لابس اسود في اسود ليه كدا ؟

الدكتور : مفيش دا انا رايح ازور صديق ليا بيته اتقصف  واهله كلهم ماتوا وهو الوحيد اللي اتبقي ,, هروحله المستشفي .

زوجته : متنساش النهارده عيد ميلاد بنتك ياسمين وعريس بنتك الكبيره نرجس جاي هو عيلته النهارده .

الدكتور : متقلقيش عامل حسابي اروحله بعد ما اخلص كل اللي ورايا .. المهم طمنيني اخبار ولي العهد ايه .

زوجته : تاعبني والله ,, شكلها هانت يا ابو ياسين .

الدكتور : يارب يجي بالسلامه , وتقوملنا بالسلامه يا حبيبتي .

زوجته : انت وشك مكتئب وحزين ليه ؟

الدكتور : زعلان علي صديقي  اللي فقد اهله .. موضوع صعب اوي اما تفقد اعز ما لديك وانت واقف متكتف مش عارف تاخد حقك من مين .. بس انتي عارفه برضو هو اللي غلطان ايه اللي وداه المكان اللي فيه قلق ,, سايب البلد كلها  والمناطق الامنه ورايح برجله للقلق ما ينقل من المكان اللي هو فيه , سوريا لسه بخير بس الاخبار والتصريحات اللي في التلفزيون هي اللي مزعلاني اكتر بيهولوا الدنيا اوي . وحتي لو فيه ثوره فهي سلميه سلميه لاقصي درجه .

زوجته : مفيش حاجه اسمها ثوره سلميه ,, كل الثورات لابد وان تلوث بالدماء  عشان تنجح .

الدكتور : بس بس اسكتي خالص .. دم ايه وقتل ايه ,, البلد بامان متصدقيش كلام الاعلام ,, وبعدين انتي هتغمينا ليه النهارده يوم سعيد باذن الله .

زوجته :  بأذن الله , بس قولي صديقك دا كل اهله كلهم ماتو محدش اتبقي ؟.

الدكتور : للاسف لأ كلهم ماتو ,, انتي عارفه مراته كانت علي وشك الولاده ,, وكنت بتحضر دكتوراه في الرياضيات ,, وبناته الاتنين بقوا اشلاء مش لاقين جثثهم حتي ,,, كل شئ من حوله اتهد الارض اللي بتأويه ضاقت عليه  و فقد فيها اعز الناس حتي القبور مش هيقدر يروح يتعلل بالاموات ولا يخاطب ارواحهم لان حتي اللي اتبقي منهم يتعزي بيه  مش موجود  كله بقي مجرد ذكري الوقت كفيل يمحيها ,, وكأن تعبه اللي تعبه عشان يكون اسره ناجحه اتهد في ثانيه وكل دا انتي عارفه سببه ايه ؟

زوجته : ايه ؟

الدكتور : يبقي فيه مبرر للرؤساء وغيرهم انهم يطلعوا في المؤتمرات ينتحبوا والدموع الكدابه تنزل من عنيهم  ويصدروا للرأي العام اخبار كاذبه عن سوريا واللي بيحصل فيها وكله تزييف وتلفيق  احنا اهو مسمعناش صوت رصاص حتي او حتي مظاهره فين بقي الكلام اللي بيقولوا عليه.,, كل الدول بتزايد علي سوريا ,, جبين العروبه والعرب ملطخ بالتزييف و العار  ..

زوجته : متقلقنيش بقي خليني اعرف اكمل اليوم ,, انت اتفقت مع محل الحلويات علي تورتة ياسمين و جبتلها هديتها ,, خلي بالك البنت دي عنديه ومتقبلش باي حاجه دي ممكن تفضحك .

الدكتور : طبعا طبعا كل حاجه عملتها ومن قبلها بفتره كمان .

" تدخل عليهم بنتهم ياسمين وهي تبكي بكاءا شديدا من شدة الخوف "

زوجته : مالك يا بنتي مالك يا حبيبتي  ؟

الدكتور: تعالي يا حبيبتي  اهدي اهدي ,, ف ايه ؟

ياسمين : كنت بتفرج علي الاطفال  فجأه القناه اتحولت لاخبار انفجاارات و ضرب و دم و جابوا صور لاطفال ميتين ,, والدم مغطي كل وشهم ,, الدم مغطي كل حاجه لعبهم هدومهم وكتب المدرسه وشنطهم ومنهم صحابي , شوفت يزيد و قصي وجني و يمني ,, انت عارف يا بابا  كنا متفقين يجوا بكرا عندنا هنا وهنلعب في الحديقه ,, ماتوا يابابا هما قتلوهم ليه ها  قتلوهم ليه ,, ليه يارب اصحابي يموتوا ,, ليه يارب اصحابي يموتوا .

الدكتور : متصدقيش كلامهم يا حبيبتي دول كدابين ,, اصحابك بخير وهيجولك وتلعبوا متصدقيش كلام التلفزيون احنا بلدنا جميله .

زوجته : " تاخذها بعيدا " انتي عارف يا حبيبتي النهارده هنعمل ايه ,, هنعمل حفله كبيره ... " تكمل معها الحديث وتلاعبها "

" تدخل نرجس "

نرجس : بابا ,, بابا .

الدكتور  : نرجس حبيبتي ,, معلش اعذريني الخبر اللي جبته اختك خلاني اسرح فيه شوية .

نرجس : خير يا بابا خير ,, ربنا يستر علينا ويرحمهم

الدكتور : يارب يا بنتي يارب ,, خير كنتي عاوز حاجه .؟.

نرجس : انا بس بفكرك ان محمد واهله علي وصول يعني , عشان تعمل حسابك .

الدكتور : بتحبيه اوي كدا يا نرجس دي تالت مره تفكريني النهارده انهم جايين .

نرجس : محمد دا يا بابا احن راجل في الدنيا ,,انت اول ما هتشوفه هتحبه ,, وهتبقوا صحاب ولا عمو فيصل باباه كان المدرس العربي بتاعي الفصل زمان كان بيعملني من صغرني علي اني بنته,, و ماماته دلوقتي دكتوره علوم سياسيه واقتصاد عندي في الجامعه كل ما بحتاج حاجه بروحلها مش بتتاخر عني ,, عيله جميله اوي يابابا هتحبهم خالص خالص . متنساش بقي واعمل حسابك النهارده جااايين النهارده .

الدكتور : ههههههه يابنتي حاضر  عامل حسابي والله  يا حبيبتي ,, هتكبرينا يا نرجس هتكبرينا ,, ربنا يباركلك يا حبيبتي وتبقي جوازه خير وسعيده عليكي يارب .

نرجس : يا رب يا بابا .

الدكتوره : بنتك هتكبرنا يا ام نرجس .

زوجته : ام نرجس دا ايه " تضع يدها علي بطنها " ام ياسين ,, وبعدين اتكلم عن نفسك انا لسه شباب .

الدكتور : شوفتي امك يا ياسمين بتقولي عليا كبير ,, هاتيلي حقي بقي .

ياسمين : ماما , بابا حلو وصغير وبيلعب معاايا ,, مش انتي اللي كل شوية تقوليلي استني اما اخلص مذاكره ,, انت كبرتي علي المذاكره ياماما .

نرجس : انتي هتقدمي الدكتوراه بتاعتك امتي ياماما ؟.

زوجته : هانت يا بنتي هانت لسالي فصلين وابقي خلصت الرساله بتاعتي هتعمل قلق في علم الرياضه اكيد انا متاكده انها هتعوضني سنين تعبي فيها  .

نرجس : ان شاء الله يا ماما .  

الدكتور : انا سامع صوت خبط ,, حد سامعه .

زوجته : مش قولتلك كبير وبتخرف .

الدكتور : يمكن  . 

" يتحرك الدكتور ناحية المكتب ويقرأ في الجريده  ,, زوجته تاخد ياسمين وتذاكر معها و نرجس تتحدث الي الهاتف "

الدكتور : القصف الروسي مستمر و وزارة خارجية امريكا يستنكر التدخل في الشأن ..... " يقلب الصفحه " الهدنة قاربت علي الانتهاء والقصف قد يجتاح حلب باكملها . اي كلام فاضي وخلاص . احنا في حلب اهو ولا سمعنا صوت سارينة اسعاف حتي . ام نرجس يا  ام نرجس بقولك عاوز اخد رأيك في موضوع .

زوجته :  ما قولنا ام ياسين بقي  خير  يا ياناصر ,,بتنادي ليه ؟.

الدكتور:انا بفكر اكلم دكتور صاحبي من جامعة بنها ,, كنت اتعرفت عليه وانا في السعوديه ,, بفكر اكلمه ينزل يقضي معانا اسبوع هنا ايه رأيك ؟.

زوجته : والله تبقي فكره لطيفه انه ييجي هيتبسط جدا  

الدكتور : انا قولت كدا برضو .. انا هكلمه وخليه يشوف انسب معاد ليه ايه ويجي ان شاء الله .

المشهد الثاني

عين المشهد السابق

" نرجس تقدم محمد وعائلته لعائلتها.. طوال المشهد صوت خبط علي الباب  "

نرجس : بابا ,,, يا بابا,, بابا .

الدكتور : خير يا نرجس خير يا حبيبتي .

نرجس : محمد وعيلته وصلو ,, وصلو تحت اهم يا بابا انا هنزل افتحلهم .

الدكتور : طب اهدي اهدي .. طيب .. يقولوا عليكي ايه دلوقتي  هبله .

نرجس : محمد جه يابابا .. محمد جه يابابا .

الدكتور : استاذ فيصل . اهلا وسهلا بيك و بالعائله الكريمه شرفتوا ونورتوا والله ؟

ا.فيصل : الشرف لينا والله يا دكتور .

زوجة الدكتور : منوره يا دكتوره يسرا والله انتي ومحمد و يوسف . النهارده والله يوم سعيد عشان منورنا .

زوجة فيصل : احنا هنبقي اهل مفيش بينا الكلام الرسمي دكتوره ايه وكلام فاضي ايه .. وبعدين انتو ناس طيبين واهل كرم يعني الفرحه لينا احنا اننا دخلنا بيت محترم زيكو وكفايا القمر نرجس هنا ولا ايه يا محمد .

محمد : اه طبعا طبعا يا امي .

الدكتور  : مكسوف يا محمد والله .

" فيصل وزوجته يضحكان "

محمد : لا يا عمو والله مش كسوف ولا حاجه .

الدكتور : طب خد خطيبتك واقعدو مع بعض .

زوجة الدكتور : قومي يا نرجس يلا مع محمد .

زوجة فيصل : شوف العيال مكسوفين ازاي ,, وهما ليل ونهار في التليفون و مع بعض في الجامعه ,, عاملين نفسكو اول مره تشوفوا بعض يعني .

ا.فيصل : متحرجيش الولاد بقي يا يسرا " يضحك بتكلف "

ياسمين : يوسف يا صاحبي .. صاحبي مالك متضايق ليه  .

يوسف : كبريت ..

ياسمين : لأ ماما قالتلي الكبريت غلط بيحرق يعمل واوا .

يوسف : كبريتٌ كبرت .. بائعة الكبريت.

ا.فيصل : ايه رايك يا دكتور ناصر في اللي بيحصل في البلد اليومين دول  .

دكتور ناصر : ايه اللي بيحصل البلد تمام وكويسه جدا ,, دا انا حتي لسه عازم دكتور صاحبي انه يجي يقعد يومين هنا معانا .

زوجة فيصل : غريبه يعني انت مش بتفتح تلفزيون ولا ايه .؟

دكتور : بفتح والله بس الكلام دا تهويل و بيضخموا المواضيع اوي . طب ما احنا اهو بقالنا كام شهر عمالين نقرا في اخبار و نشوف حوارات  ولا في حاجه طالتنا ولا حاجه حصلتنا .

ا.فيصل : اللي مش هيطولك النهارده هيطولك بكرا . تطور الاحداث اسرع من الوقت .. انا عن نفسي قلقان جدا .

زوجة دكتور: قلقان ايه بس ,, وبعدين اقفلوا علي السيره دي , احنا جايين نفرح .

زوجة فيصل : علي رأيك .

" يضحكون "

محمد : اخيرا يا حبيبتي اخيرا حلمنا هيتحقق و هيتقفل علينا باب واحد .

نرجس : ايوا يا محمد  , فاكر فاكر لما كنت بقولك اصبر وهنول في الاخر اللي احنا عاوزينه .

محمد : انتي سبب كل حاجه حلوه حصلتلي وهتحصلي . ربنا يخليكي ليا .

نرجس : ويخليك ليا يا حبيبي . عارف اكتر حاجه مفرحاني ايه . ان العيلتين متفاهمين مش معقدين .

محمد : الناس اللي بتفهم بتريح بتخلي الامور تعدي بتلقائيه وفرحه , مش العقد والكلاكيع والجوازه تبقي غم وهم .

يوسف : كبريت , كبريت العالم سعيد.

ياسمين : كبريت ايه يا يوسف يا صاحبي انا مش فاهمه حاجه . ماما يا ماما .

زوجة ناصر : ايوا يا سمين ياحبيبتي .

ياسمين : يوسف يا ماما كل شويه يقولي كبريت ومش عاوز يلعب معايا .

ا.فيصل : يوسف عيب بقي خلاص . انسي يا حبيبي انسي والعب مع ياسمين.

دكتور : خير يا استاذ فيصل يوسف ماله ينسي ايه ؟

فيصل : لا مفيش دا موضوع خايب كدا انت عارف الاطفال ودلعهم .

يوسف : اقفوا في طابور .. محدش يتحرك .. انزل من عربيتك ,, فتشهم كلهم ,, اهل البلد دي لازم يعرفوا هما وقفوا ضد مين  .

الدكتور : في ايه  ؟

أ.فيصل :  يوسف ولد عيب . قولتلك خلاص بطل .

يوسف : مش خلاص  يا بابا مش خلاص  .... اووه شايف النسوان اللي هناك دي .. شكلنا لقينا حاجه نتسلي بيها النهارده .. عدي الناس عديهم انجزوووووا .. وسيبلي بقي الوليه دي هي وبناتها .

زوجة فيصل : احنا اسفين يا جماعه ,, ولد يا يوسف قولت خلاص هاجي اضربك .

يوسف  : " بصوت انثوي شديد الذل " انا من المؤيدين لكم اقسم لكم بشرفي . " ثم بصوت رجولي شديد الغلظه "  : شرفك ايه يا وليه انتي اللي زيك له شرف .. الحلويات اللي واقفين وراكي دول بناتك .

ياسمين : انت بتقول ايه يا يوسف انا مش فاهمه حاجه .

نرجس : هو يوسف ماله يا محمد هو بيحكي ايه .

محمد : ها ,, كبريت كبريت .

نرجس : كبريت ايه يا محمد مش فاهمه .

أ.فيصل : ولد يا يوسف  والله لو مسكت لاعاقبك عقاب شديد بطل الهبل اللي انت بتقوله دا .

محمد : والله احنا معاكو سيبونا نعدي بيوتنا اتهدمت  خلونا نعدي في امان واللي انتي عاوزينها هعملوا بس بناتي لأ بناتي لأ .

محمد ويوسف : كبريت .. كبريت ,, العالم سعيد .

دكتور : هو محمد ماله يا نرجس في ايه ؟

نرجس : معرفش والله ,, اول ما يوسف بدأ يتكلم لقيت وشه اتغير .. و بدأ يقول الكلام بتاع يوسف دا .

زوجة فيصل : ايه يا محمد انت كمان ,, دا انت الكبيرالعاقل . هتتهبل ولا ايه . ما تشوف ابنك يا فيصل .

يوسف  : بوم بوم بوم بوم ,,, طاخ طاخ طاخ .. طيارات فوووق  اضرب  صواريخ .. طااااخ .. اجري ياعم قصي اجري يا عم غسان ,,, بوووووم طااااخ.

محمد : ابني ابني ... لازم نسيبه لازم نسيبه ,, بووووووم بووووووم ... هاهاهاهاهاهاهاهاهاها ... رايحين فين ... الاطفال جواه بتموت .. ما يولعوا ..  لأ  هننقذهم ... بووووووم .. سيبهم يابابا مش لازم سيبهم ..

يوسف : كبريت .. كبريت .. العالم عامل عبيط . كبريت كبريت .

ا.فيصل : العيال اتهبلت باين ,, لا حول ولا قوة الا بالله .. احنا مش متفقين منكلمش عن الموضوع دا نهائي .

دكتور : موضوع ايه ؟

زوجة فيصل : القصف .. جيراننا اتقصفوا قدام عنينا .

محمد : بعد ما قصفوا جيرانا  روحنا المشرحه جثث كتير دور ياعم غسان معايا علي جثة ابنك ,, هو دا لأ هو دا لأ ,, صوت جاي من التلاجات بيقول اه الحقوني هموت ,, جرينا ع التلاجه .

يوسف : كبريت كبريت بائعة الكبريت .

ياسمين : في ايه يا يوسف يا صاحبي .

يوسف : كبريت كبريت ,, شوفت صحابي بعيد .. بيبيعوا الكبريت .

ياسمين : بيبعوا !! مش ااصحابنا اللي يبيعوا دول ماتوا النهارده انا شوفتهم في التلفزيون والدم مغطيهم .  بس بابا قالي دول كذابين .

يوسف : الجنود كان بيدوسهم برجليهم  وهم بيبيعوا الكبريت ,, اصل اصحابنا بيوتهم اتهدمت بعدا ما الطيارات فوووووو فوووووو بوووووم ومفيش فلوس معاهم فا اصحابنا بيبيعوا الكبريت عشان ياكلو وياكلو عيلتهم  ,, كبريت كبريت العالم سعيد   .

محمد : عرضت عليهم نفسها بس بناتها يعدوا و محدش يلمسهم ... الجنود خادوها جوا .. كان كل ما يعروا منها جزء نبرد احنا احنا اللي اتعرينا يا امي مش انتي ,, الرجاله وقفوا في طابور وشايفين جسد اُمه باكملها يغتصب ومطاطين راسهم عشان يعدو في امان من التفتيش ..  سمعنا صوت سوريا يستغيث وسمعنا انفاسهم  وخطواتهم وحركاتهم وهي بتجتاح و بتخطي علي جسد سوريا المطعون غدر  .. احنا شوفنا أٌمه كامله بيتم مضاجعتها  ,, امه باكلمها يمارس معها الجنس علانية .. ومحدش فين اتحرك .

يوسف : كان بيبعيوا كبريت ... والجنود قتلوهم ,,, والعالم سعيد . اصحابي اتشردوا و لعبهم اتكسرت و الجنود قتلوا باباهم وماماتهم ,, يارب يارب ساخبرك بكل شئ .. صرخ صاحبي فيهم وامه ميته قدامه و قال ساخبر الله بكل شئ.

يوسف وياسمين معاً :  " يصرخون "  سنخبر الله بكل شئ .. سنخبر الله بكل شئ . 

" يستمر في الغناء بصوت منخفض اثناء حكي محمد "

محمد : جرينا علي التلاجات لقينا واحد لسه حي جسمه كله رصاص ,, ولقينا جنبه بن عم غسان ,, الواد قلنا اننا لو كنا جينا بدري خمس دقايق كنا لقينها حي هو كمان ,, بووووووم بووم طيران صواريخ ,, افتح قنوات الاخبار مانشيت بالبنط العريض من ينقذ سوريا ؟,, هاهاهاهاهاها ,,, مؤتمر القمه رقم 10 الاف تسعمية خمس وتمانين عن تطورات الازمه في سوريا هاهاهاهاهاهاها ,, ولع في التلفزيون بالكبريت ,, كبريت كبريت

محمد ويوسف وياسمين  : كبريت كبريت ,, الجنود قتلوهم ,, و العالم سعيد .. والام اغتصبوها ,,قدام ولادها  و عروها ,, كبريت كبريت ,,  والعالم سعيد .. وسوريا اليوم شهيد سوريا اليوم شهيد ,, كبريت كبريت .

محمد  : احنا شوفنا سوريا علي اسرة الرؤساء والملوك تهان و تغتصب و ينتهك عرضها .. سلمان الحلبي  راح مصر عشان يخلصهم من كليبر ,, من لكي يا سوريا  يخلصك ... دولنا العربيه عقمت عن انجاب سلمان عربي جديد  وبيحطوا ايديهم في ايدي القتله و يتصوروا معاهم مبتسمين ,,, كبريت كبريت ,, الاطفال ماتوا لجل عيدان كبريت .

نرجس : سوريا اليوم شهيد .

دكتور ناصر : طب اهدي يا حبيبي اهدي وكل حاجه هتعدي علي خير .

ا.فيصل : مش باينلها خير يا دكتور والله .

محمد :  نرجس ,رغم كل الضرب و بيوتنا اللي اتدمرت والطريق اللي مشيناه عشان نيجي  هنا واللي كان ممكن نموت عليه في  اي ثانيه ,,اصرينا نيجي ,, ولازم  نيجي واخطبك ونفرح ,, سوريا عمرها ما حرمتنا من الفرح في عز شدتنا ,, في شدتها احنا لازم  نفرحها ,, هندوق المر  وندوقك انتي الفرح يا سوريا .

نرجس :" وهي تبكي "  لو النهارده اخر يوم في عمرنا ,, لازم نموت واحنا مبسوطين ,, عشان هنموت في بلدنا وارضنا الحضن الدافي الصادق .

يوسف وياسمين ومحمد ونرجس  : الاطفال ماتو لجل عيدان كبريت ,,, والعالم سعيد ,, وسوريا اليوم شهيد  . كبريت كبريت .

 دكتور : احنا  شكلنا  لازم نسافر مصر في اسرع وقت ليا صديق هناك هيوفرلنا كل اللي عاوزينه . لازم نسافر في اسرع وقت ,, احنا اللي علينا الدور مفيش مكان امن لينا هنا خلاص  .

أ.فيصل : تسافر فين ها تسافر فين ؟؟ تفتيش في كل مكان و ضرب واهانه و لازم تبيع شرفك لازم تبيع اي حاجه عشان تعدي لازم تتخلي عن مبادئك وتسيب المرتزقه يدوسوا عليك عشان يرضوا عنك  .

زوجة فيصل : اطفالنا عليهم الدور ,, اطفالنا عليهم الدور ... هنبيع كبريت كلنا  هنبيع كبريت .

زوجة الدكتور :  لو هنبيع كبريت ,, يبقي نحرق بيه نفسنا قبل ما يحرقونا . الكبريت اللي في ايد الاطفال في الشوارع  النهادره ,, بكرا هيبقي جهنم للقتله في يوم ما تعود سوريا .

ياسمين : انت عارف يا يوسف ياصاحبي النهارده عيد ميلادي ومعايا شمع وهنولعه .

 يوسف : بالكبريت ,,, كبريت كبريت .

نرجس: يا جماعه يا جماعه اهدوا ,, لازم نشوف حل .

ياسمين : لأ انا عاوزه عيد ميلادي ,, بابا مش انت جبت التورته ,, وجبت الهدايا . يلا يا بابا اعملي عيد ميلادي .

الدكتور : حاضر يا حبيبتي هنعمله .. انا سامع صوت خبط جامد علي الباب يا جماعه حد يفتح يشوف فيه ايه .

زوجة الدكتور : مفيش حاجه يا ناصر .. مفيش خبط .

يوسف  : دا تلاقيه صوت الطياااراات فووووووو ,, بوم بوم بوم .

يوسف وياسمين ومحمد ونرجس  : كِبريتُ .. كِبريتُ ,, سوريا اليوم شهيد .

المشهد  الثالث

" عائلة محمد دخلوا لتبديل ملابسهم استعدادا لعيد الميلاد ومعهم ياسمين و نرجس .. تبقي الدكتور وناصر وزوجته "

الدكتور : لازم نمشي بسرعه , لازم نلاقي حل ,, احنا هنعمل عيد الميلاد لازم نعمل عيد الميلاد لازم قبل ما نمشي من البلد اللي العيال اتربوا فيها يحسوا ان مهما كنا في خطر ,, بلدنا محرمتناش اننا نفرح تحت سقفها ,, حتي وهي بتقسي بتدينا فرصه للفرحه .. لازم نمشي من ارضنا بذكري سعيده .

زوجته : مش هتروح عزا صاحبك  . انت من ساعة ما قولتيلي الخبر وانا حاسه ان الدور علينا .

الدكتور : صاحبي ,, اه لازم اروحله هخلص عيد الميلاد واروحله ,, لازم ميفارش بالك,, بناته كانوا جمال اوي ,, كانوا تشوفيهم  يجيلك تفائل واقبال علي الحياه بنته الكبيره كانت علي وش جواز و كانت بتحب  خطيبها اوي كانوا خلاص يوم القصف هيتفقوا علي كل حاجه ,, ولا بنته الصغيره حاجه متتوصفش خفة دم و براءه وحضنها حنين اوي ,, ابتسامتها تردلك الروح وتقعد كل شوية تنفخ في شعرها و لما تتعصب تاخد جنب وتعيط تحسي انك عاوزه تاكليها اكل ,, ربنا يرحمهم  .

 زوجته  : يا رب يا ناصر ,, انا مش قادر استوعب ايه اللي بيحصل دا وليه ,, لمصلحة مين بحور الدم و الاطفال تتشرد و البيوت تتهدم ,,  فاكر شوارع سوريا قبل اللي بيحصل دا ,, كانت جنه , كان العالم كله بيجي يتفرج علي شوارعنا القديمه والتراث ,, دلوقتي بقت خراب ,, سوريا بقت رماد ,, اشلاء واجساد ملهاش ملامح فوق بعض ,, النهارده بنصلي علي جيرانا بكرا جيرانا يصلوا علينا , كل اللي ضدك عدوك مفيش تفاهم لازم يتقتل ,, بعد ما نموت كلنا هيحكموا مين ,,  هيحكموا مين ؟ والضمير العربي ,, الضمير العربي فين ,, و ابواق الاعلام فالحه بس انقذوا سوريا ,, سوريا تحترق , حلب تحت الحصار , الاطفال انقذوا الاطفال ,, كلام في الهوا كلام في الهوا كله كلاام .

الدكتور : يا حبيبتي لو كانت اطفال سوريا تنزف بترول لاشتعل الضمير العربي ,,, لكن  هما مش مدركين ان الاطفال بينزفوا ما هو اثمن من البترول , اطفالنا بتنزف مستقبل , بتنزف وطن مشرق , بتنزف علم  وتنزف شخص كان ممكن يبقي عالم و بنت كانت ممكن تبقي ام تبني مجتمع ,, اطفال  سوريا بتنزف حضاره , وفي عصرنا دا الحضاره ملهاش تمن ,, الحضاره مش موجوده في كتب الاقتصاد غير انها مصطلح , لكن البترول في كتب الاقتصاد يعني الفلوس يعني كل شئ .

زوجته  : لحد امتي هيفضل الفلوس اللي بتحكم يا ناصر لحد امتي ؟ لحد امتي الدم العربي ملوش تمن , لحد امتي يا ناصر؟ .

الدكتور : الامم المصابه بالجهل والتخلف و التخوين و التعصب عمر الدم اللي بينزف فيها ما يبقي له تمن .

زوجته : اقفل علي الكلام دا بقي العيال جايين روح اطفي النور وحضر  التورته  ,, انا هدخل اغير واجي .

الدكتور : ماشي  انا هروح اقفل النور اهو  .

-         اظلام –

المشهد الرابع

" يقف الدكتور ناصر في وسط الحجره يحمل تورته بها سبع شمعات  و يدخل الجميع عليه يرتدون ملابس ملطخه بالدماء و الاصابات والجروح تملأ وجوههم ,,  الاطفال العابهم ممزقه و ملطخه بالدماء , النساء ممزقه ثيابها و بطن زوجته الحامل مغطاه بالدماء ,, الرجال يزحفون عالارض جسده شبه عاري و مغطي بالدماء " – اصوات الخبط علي الباب صوتها يزداد.

الدكتور : ايه دا ؟ مالكوا ايه اللي عمل فيكو كدا ؟ ايه الدم دا .؟ انتو لابسين كدا ليه يا جماعه ,, يلا يلا روحو غيروا و تعالو عشان نطفي الشمع . .. انتو مبتردوش ليه ؟! بكلم نفسي انا ؟

" لا يتكلمون ويتحركون ببطء بعيدا عنه ينتشرون في  ارجاء الغرفه و يتحرك الدكتور لكل واحد منهم ويحدثه "

الدكتور : ايه يا دكتوره اللبس دا ها ايه الدم اللي علي وشك دا في ايه ؟ .... انتي مش بتردي عليا ليه .. النهارده عيد ميلاد ياسمين والتورته اهي طفي الشمع يلا طب غني معايا لياسمين .. سنه حلوه يا جميل .

" تبدأ زوجة استاذ فيصل في غناء بصوت منخفض "

الدكتور : طب خلاص بلاش الدكتوره ,, قولها يا استاذ فيصل تغني يمكن هي مش بتسمع غير كلامك  ,, بتحبك يا سيدي .. استاذ انت كمان مش بترد ليه ,, شوف شوف التورته اهي عيد ميلاد ياسمين يا استاذ فيصل صاحبة يوسف ابنك ,, طفي معايا الشمع طب خد حته ,, دي طعمها حلو .. ما ترد يا استاذ فيصل  مالك ؟ شيل شيل الدم  اللي مغطيك دا والبس البس من عندي اي طقم تحبه ,, استاذ فيصل . ما ترد !!

" يكمل معها زوجها الغناء "

الدكتور : محمد ونرجس انتو اقفين بعيد ليه وبعدين ايه دا حاضنها كدا عيني عينك ,, اقولك مش مهم انا راضي انا اصلا وافقت عليك البنت نرجس دي بتحبك جدا ,, طفوا معايا الشمع يلا انا وافقت اهو يا نرجس علي محمد مش دا محمد اللي بتحبيه .. يلا يا ولاد متزعلونيش بقي ,, يلا عيد ميلاد الليله مين ؟ عيد ميلاد ياسمين .. يلا يلا قولوا ,, طب ردوا عليا طيب عيب كدا يا ولاد .

" ينضم اليهما صوت محمد ونرجس ويرتفع صوت الغناء "

الدكتور : ايه يا يوسف انت وياسمين دا انتو نمتوا وحاضنين لعابكوا كدا ليه ,, قوموا يلا ييلا ياسمين تورتك اهي ,, وعليها صورتك ,, قومي يلا عيد ميلادك اهو اللي انتي مستنياه ,, ولعبك مليان دم ليه كدا قومي يا حبيبتي وسبيها انا جبتلك واحده جديده اهي حتي شوفي ,, شوفي يلا يا يوسف قوم ياسمين والعبوا باللعبه وتعالو عشان نغني ونطفي الشمع ,, انتو كمان زيهم مش بتردوا عليا .

" ينضم اليهم ياسمين ويوسف ويعلو الصوت بشده "

الدكتور : مفيش غيرك يا ام ياسين انتي وياسين اللي هتنصفوني ,, انتي مالك قاعده كدا ليه ,, لا قومي كدا واصلبي طولك ,, شكل ياسين هيعملها ولا ايه ,, اهو اتبسطي يا ستي هيتولد في ارضه اهو واول نفس هياخده هيكون علي تراب بلده ,, قومي بقي متدلعيش ,, قومي قومي يلا " يجذبها فتقع علي الارض " .. انتي بتدلعي والله ومال بطنك مليان دم ولا ايه اكلمك دكتور .. لأ ام ياسين متقلقنيش ,, طب رد عليا يا سين شوف كلهم مطنشني ازاي .. رد عليا انت يا بني رد يا حبيبي .. ام ياسين لأ يا ام ياسين دا احنا بقالنا سنين مستنين الواد ,, متجيش في الاخر وتدلعي .. قومي قومي يلا قومي انتي هتبقي كويسه .

" تنضم زوجة الدكتور والاغنيه تصبح صريخا "

" يقف الدكتور في وسط المسرح وهم حولهم يغنون وصوت الباب يطرق بشده "

الدكتور : سنه حلوه يا جميل ,, سنه حلوه يا جميل ,, سنه حلوه يا ياسمين ,, يلا حالا بالا بالا حيو ابوا الفصاد هيييييييه .. هيكون عيد ميلاده الليله احسن الاعياد فليحي ابو الفصاد . .فليحي ابو الفصاد .

" يبدأ وهو يغني بصوت مرتفع ثم تدريجيا يخفت وهو ينزل الي الارض بنفس تدريج صوته وبين يديه التورته ويطفي الشمع بالتزامن مع صوت كسر الباب  , مع كسر الباب يدخل شخصان يرتديان بدله "

ش 1 : ايه يا دكتور فيصل ,, بقالنا ساعه بنخبط .

ش2 : بس اسكت اسكت .. دا باينه لسه زي ما هو حالته زي الزفت .

ش1 : صعبان عليا جدا .. من يوم وفاة اسرته في القصف الاخير في حلب وهو علي الحال .

ش2 : هنروح نقول لرئيس الجامعه ايه دا باعتنا مخصوص عشان نشوف حالته اتحسنت ولا لأ .

ش1 : هنعمل ايه يعني ,, هنروح نقوله لسه بيعمل عيد ميلاد بنته لحد النهارده .

ش2 : لا حول ولا قوة الا بالله .. يلا يا بني نمشي يمكن بكرا لما يصحي ويفوق يبقي كويس .

" يرحلان "

-         اظلام-

المشهد الخامس .

" حجرة  بها مكتب وعليه بعض الكتب و برواز صور , يرتبه الدكتور ناصر وينظفه , وفي احد الزوايا الاخري من الحجره  يوجد بعض الاثاث  - طاوله صغيره وحولها  اربع كراسي جلديه  , الدكتور يرتدي بدله سوداء  "

          

الدكتور : " يتحدث وهو يرتب مكتبه " طبعا طبعا مؤتمر بنيويورك لدعم سوريا و ايجاد  حل للازمه ,, كتاب محاكم التفتيش ايه اللي جابك ف ايدي دلوقتي دا حتي فال وحش , لكن غريبه يعني حتي المساعدات الانسانيه بتقصف يعني ايه ذنبه دا رايح يساع , مش قالو ان هم جاين يساعدوا البلاد المحاصره طب بيقصفوا ليه المساعدات , موضوع غريب , الشيطان يعظ لنجيب محفوظ ياه كان نفسي اكملها احطها هنا ف الاول عشان اول ما اشوف افتكر ,, كام دوله بقي هيجتمعوا, الدول بتتجمع بيعزوا بعض ويقولو كفايا دم و انقذوا الاطفال  واحنا نروح نعزي بعض كل يوم في واحد قريب مننا يموت وبعد اجتماعتهم نعزي بعض اكتر  حاجه غريبه , الموضوع تحس ان في حاجة بتحركه بشكل منظم جدا ,, اعلي من قدرتنا علي الفهم والاستيعاب , احجار علي رقعة الشطرنج ايه اللي جاب الكتاب دا عندي مش فاكر اني اشتريت حاجه ز ي دي ,, عموما خير زيادة في الثقافه والمعرفه . 

" في اثناء  كلامه ينظر بجانبه منتظر خروج زوجته ,, ولا تخرج .. يُخرج من درج المكتب حبل ,, ويرفع الكرسي علي المكتب ويرطب الحبل بالسقف "

الدكتور : متقلقيش عامل حسابي اروحله بعد ما اخلص كل اللي ورايا .. المهم طمنيني اخبار ولي العهد ايه . .. صعب اوي يا حبيبتي  اما تفقد اعز ما لديك وانت واقف متكتف مش عارف تاخد حقك من مين.. دايره وبتدور علي الكل ومحدش عارف راسه من رجله.... ربنا يباركلك يا حبيبتي وتبقي جوازه خير وسعيده عليكي يارب.... انا سامع صوت خبط ,, حد سامعه ..... شوفتي امك يا ياسمين بتقولي عليا كبير ,, هاتيلي حقي بقي.... كبريتٌ كبريتٌ ,, سوريا اليوم شهيد .. هنعمل عيد الميلاد لازم نعمل عيد الميلاد..... هما مش مدركين ان الاطفال بينزفوا ما هو اثمن من البترول , اطفالنا بتنزف مستقبل , بتنزف وطن مشرق.... هيكون عيد ميلاده الليله احسن الاعياد فليحي ابو الفصاد . .فليحي ابو الفصاد .

" يسترجع اجزاء من حديثه طوال اليوم وهو يربط الحبل و بعض الاجزاء وهو يضع الحبل حول عنقه ثم ينهي حياته وهو يغني اغنية عيد الميلاد "

" اغنية عيد الميلاد: هابي حرب تو يو

هابي قصف تو يو

سنه مُره يا وطن

سنه مليانه بمحن

سنه ظلم..العدل فين

سنه فيها الكون حزين

سنه مُره سنه مُره سنه مُره وخوف وليل –

المشهد السادس

" مجموعة الشباب "

ش1 : وهم كل حاجه بقت وهم .

ش2 : تكوين اسره سعيده وهم ,, ننا نفرح وهم ,, اننا نعيش في امان وهم ... اننا حتي نعيش بس وهم . كل حاجه حوالينا بقت وهم .

ش3 : يعني ايه ها يعني حد يفهمني كدا اللي بيحصل واللي لسه هيحصل ,, حد يفهمني يمكن انا مبفهمش ,, طب ايه السبب ,, طب مين المستفيد .

ش1 : برضو الوهم ,, احنا بنشتري الوهم وبنصدقه و بنعيش فيه ونتعايش معاه عشان مش عاوزين نصدق الحقيقه المره ,, مش عاوزين نصدق ان اللي ماتو هم اللي نجو وان اللي لسه عايش هو اللي بيتألم انه شايل ذنب كل طفل مات و كل نقطة دم ازهقت بدون وجه حق ,, احنا اللي بنتألم احنا اللي المسئولين مش حد تاني .

ش2 : احنا اللي قبلنا بالوهم و اتبسطنا بيه ,, احنا اللي بنينا حياتنا ومستقبنا وامننا و اطمائننا عليه ,, لكن نسينا انه وهم في ثانيه يتهدم ونفوق  من الغيبوبه ونصحي ونشوف الحقيقه واضحه..

ش3 : نشوف الدم دم بلونه و معناه ,, ونشوف الموت موت بكآبته و سواده ,, ونشوف الظلم ظلم و الحق غايب و نشوف الصدق  عيب ,, ونشوف الزمن اللي بقينا فيه معدومين القيمه ,, نشوف الزمن اللي بقينا فيه مجرد عرايس بتأدي دورها ولما اللي بيحركها يزهق منها يكسرها .

ش1 : بلاد العرب اوطاني وكل العرب اخواني , بلاد العرب اوهامي وكل العرب اكفاني .

جميعهم : بلا العرب اوطاني وكل العرب اخواني .. بلاد العرب اوهامي وكل العرب اكفاني .

-         تمت -